Zavodun avadanlıq parkı tam şəkildə yenilənərək bu gün dünyanın ən qabaqcıl sənaye ölkələrində istehsal olunan yüksək dəqiqlikli cihazlarla təchiz edilmişdir. İstehsal prosesində Tayvan, Almaniya, Böyük Britaniya, Yaponiya, Çin və Cənubi Koreya kimi lider ölkələrin dəzgah və avadanlıqlarından istifadə olunur. Müxtəlif profilli torna, frez, karusel, içyonuş və yivaçan dəzgahların tətbiqi həm keyfiyyəti, həm də istehsal səmərəliliyini əhəmiyyətli dərəcədə artırır. Tökmə sahəsində quraşdırılan 2,5 tonluq, 1,5 tonluq induksiya sobaları və 12 tonluq elektrik qövs sobası böyük həcmli metal detallarının yüksək standartlarla əridilməsi və tökülməsi üçün geniş imkan yaradır. Müasir tələblərə cavab verən sınaq stendləri istehsal olunan avadanlıqların 2000 atm-a qədər təzyiq altında yoxlanmasına şərait yaradır və bu, zavodun məhsullarının etibarlılığını real iş şəraitində təsdiq edir. Yapon istehsalı laboratoriya cihazları vasitəsilə hər bir detala metallurgiya, sərtlik və kimyəvi tərkib baxımından dəqiq nəzarət olunur. Bütün bu avadanlıqların birləşməsi zavoda yüksək dəqiqlikli, davamlı və beynəlxalq standartlara uyğun məhsullar istehsal etmək imkanı verir və müəssisəni regionda rəqabətsiz mövqeyə çıxarır.